Шәкен Айманов түсірген фильмдер Youtube желісіне жүктелді
«Қазақфильм» киностудиясы қазақ киносының саңлағы, КСРО халық артисі Шәкен Аймановтың актерлік және режиссерлік жұмыстарын YouTube желісіндегі өзінің ресми арнасына жүктеді.
Алматы, NEGE. Шәкен Айманов кино әлеміне 1938 жылы келді. Дәл сол жылы ол қазақтың тұңғыш дыбысты фильмі «Амангелді» картинасының эпизодтында төбе көрсетті. Одан кейін актер «Райхан», «Ақ раушан», «Абай әндері», «Алтын мүйіз», «Жамбыл», «Біз осында тұрамыз», «Біздің сүйікті дәрігер», «Бір ауданда», «Алдар-көсе» және «Қиылыс» фильмдеріне түскен.
Ал 1954 жылы Айманов режиссер ретінде өзінің алғашқы фильмін түсірді. Шығармашылық жолында 11 көркем туындыны көрерменге ұсынды. «Дала қызы», «Махаббат туралы дастан», «Біз осында тұрамыз», «Біздің сүйікті дәрігер», «Бір ауданда», «Ән шақырады», «Қиылыс», «Алдар көсе», «Атамекен», «Тақиялы періште» және «Атаманның ақыры» атты фильмдер қазақ киносының алтын қорына енді. Енді бұл картиналарды «Қазақфильм» киностудиясының youtube желісіндегі арнасынан көруге болады.
