Сенат «Назарбаев нормасына» қатысты заң жобасын мәжіліске қайтарды
Сенат «Референдум туралы» заң жобасына енгізілетін өзгерістерді Мәжіліске қайтарды. Осылайша, «Тұңғыш Президент Қазақстанның негізін қалаушы» деген норманы Конституциядан алып тастаудың алғышарттары басталып кетті.
Нұр-Сұлтан, NEGE. «Сондықтан бүгін сенат депутаттары Конституциялық кеңестің кешегі қорытындысын ескере отырып, референдумға қатысты заң жобасын қайта қарап, өзгеріс енгізді. Заң жобасы мәжіліске жіберілді», – деді сенатор Ляззат Сүлейменова жоғары палатының отырысынан кейін өткен брифингте.
Қазіргі кезде республикалық референдум туралы заңның 3-бабында: «Тәуелсіз мемлекет ретінде Қазақстан Республикасының мәртебесін, Республиканың бiртұтастығы мен аумақтық тұтастығын, оны басқару нысанын, сондай-ақ тәуелсіз Қазақстанның негізін салушы, Қазақстан Республикасының тұңғыш президенті – Елбасы іргесін қалаған Республика қызметінің түбегейлі принциптерін және Қазақстан Республикасының тұңғыш президенті – Елбасының мәртебесін өзгерту республикалық референдумның талқысы бола алмайды», - деп жазылған.
Ал сенаторлар осы мәселені: «Мемлекеттің тәуелсіздігін, Қазақстан Республикасының бiртұтастығы мен аумақтық тұтастығын, оны басқару нысанын, сондай-ақ Республика қызметінің түбегейлі қағидаттарын өзгерту» керек деген пікірге тоқталды.
Осылайша, референдумға шығаруға тыйым салынған мәселелердің қатарынан Қазақстанның тұңғыш президенті – Елбасының мәртебесін өзгертуге қатысты шектеу алып тасталады.
