Сенат жасанды интеллект туралы заң жобасын Мәжіліске қайтарды
Сенаторлар жасанды интеллектті пайдалану туралы заңға бірқатар түзету енгізуді ұсынды.
Алматы, NEGE. Сенат «Жасанды интеллект туралы» заң жобасын, сондай-ақ Әкімшілік құқық бұзушылық туралы кодекске және өзге де заңдарға енгізілетін өзгерістерді қарады.
Депутаттар жалпы алғанда заңның тұжырымдамасын қолдады, алайда бірқатар баптарға жаңа түзетулер ұсынды.
Атап айтқанда:
– Авторлық құқық нысаны ретінде жасанды интеллект көмегімен жасалған туынды тек адам еңбегінің шығармашылық үлесі болған жағдайда ғана танылатын болады;
– ЖИ иелері мен пайдаланушылары залалды азайтып қана қоймай, оның алдын алуға бағытталған шаралар қабылдауға міндеттеледі. Бұл нормалар адамның құқықтары, бостандықтары және заңды мүдделерін қорғауға да қатысты;
– ЖИ келтірген зиян үшін сақтандыру Қазақстан Республикасының заңнамасына сәйкес жүзеге асырылатыны нақтыланды.
Жалпы алғанда заң жобасы:
– жасанды интеллект саласындағы қоғамдық қатынастарды реттеуді;
– «жасанды интеллект», «мәліметтер кітапханасы», «жасанды интеллект жүйелерінің синтетикалық нәтижелері» секілді жаңа ұғымдарды заңнамалық түрде бекітуді;
– ЖИ технологияларын экономика, денсаулық сақтау, білім беру және мемлекеттік басқару сияқты салаларға кеңінен енгізудің құқықтық тетіктерін қалыптастыруды;
– уәкілетті мемлекеттік органдар мен ұлттық жасанды интеллект платформасының операторының құзыретін айқындауды;
– медиа саласында жасанды интеллект қолданылған контентке міндетті түрде белгі қоюды;
– адамның құқықтары мен бостандықтарын бұзатын (манипуляция, дискриминация, биометриялық деректерді рұқсатсыз жинау және т.б.) ЖИ жүйелерін жасауға тыйым салуды көздейді.
Сенаторлар енгізген түзетулер ескеріле отырып, заң жобасы Мәжіліске қайтарылды.
