Семейде жоғалған жеті жастағы бала табылды
Семей қаласында жоғалып кеткен жеті жастағы бала аман-есен табылды. Іздеу жұмыстары ауқымды деңгейде ұйымдастырылып, оған мыңнан астам адам жұмылдырылды, деп хабарлайды Абай облыстық полиция департаменті.
АЛМАТЫ, NEGE. Полиция мәліметінше, баланы Затон полиция бөлімінің учаскелік инспекторлары – Бекен Асыл мен Жұмағалиев Дархан тапқан.
«Инспектордың табандылығы мен кәсіби біліктігінің арқасында іздестіру жұмыстары сәтті аяқталды», — делінген полиция хабарламасында.
Жеті жасар бала үйінен шамамен 10 шақырым қашықтықтағы орман алқабынан табылды. Жердің батпақты және қиын өткелді болғанына қарамастан, тәртіп сақшылары бір сәтке де іздеуді тоқтатпаған.
Полиция барлық іздеу жұмысына атсалысқан жандарға алғыс білдірді.
Айта кетейік, баланың даму ерекшеліктері бар екені хабарланған. Ол 21 маусым күні кешкі уақытта үйінен шығып кеткен соң, байланыс үзілген.
