Семейде шыршадан құлаған мұғалімнің ісі бойынша әкімнің орынбасары күдікті деп танылды
Қазақстанның Бас прокуроры Берік Асылов Қуат Айтқалиевтің биіктен құлап жарақат алуына қатысты депутаттардың сауалына жауап берді.
Алматы, NEGE. Бас прокурордың айтуынша, 22 желтоқсаннан бастап қалалық полиция басқармасы Қылмыстық кодекстің 632-бабының 4-бөлігі бойынша («Ауыр зардаптарға әкеп соққан билікті немесе лауазымдық өкілеттіктерді асыра пайдалану») сотқа дейінгі тергеу амалдарын жүргізуде.
Қалалық шыршаны безендіріп жатқанда жарақат алған мұғалімнің ісі бойынша қала әкімінің орынбасары Арайбек Хамзаев күдікті деп танылды. Шенеунікке қатысты тергеу 27 желтоқсанда басталған.
Жалпы шыршаны безендіруге барлығы 5 адам шыққан. Оларды осы жұмысқа заңсыз тартқан мектеп директорларына сөгіс жарияланды. Ал білім бөлімінің басшысы қызметінен босатылды.
Прокуратура бұл істі ерекше бақылауына алды.
