«Семей орманындағы» өрт: Кінәлілерге сот үкімі шықты
Абай аудандық соты 2023 жылдың жазында өңірде болған ірі орман өртіне қатысты қылмыстық іс бойынша шешім шығарды.
Алматы, NEGE. Соттың баспасөз қызметінің хабарлауынша, сот орман өрті кезінде «Семей орманы» қорығы мен Жаңа Шүлбі бөлімшесінде басшылық қызметтерді атқарған В. мен К.- ның өрт сөндіруді ұйымдастыру бойынша өз міндеттерін орындамағанын анықтады. 14 адамның өліміне әкеп соқтырған өртті сөндіру кезінде қауіпсіздік шаралары сақталмаған.
Айыпталушылардың кінәсі куәлардың айғақтарымен, жүргізілген сараптамалармен, оқиға болған жерді қарау хаттамаларымен, заттай дәлелдемелерді алу хаттамаларымен толық дәлелденді.
Өрт қауіпсіздігі талаптарын бұзғаны үшін екі қызметкер 7 жылға бас бостандығынан айырылды.
– Қылмыстық кодекстің 292-бабының 3-бөлігінің санкциясында 3 жылға дейінгі мерзімге белгілі бір лауазымдарды атқару немесе белгілі бір қызметпен айналысу құқығынан айыра отырып, 5 жылдан 10 жылға дейінгі мерзімге бас бостандығынан айыру түріндегі жаза көзделген. Сот екі сотталушының кішкентай балаларының болуы және ауырлататын мән-жайлардың жоқтығы түріндегі жауаптылықты жеңілдететін мән-жайларды ескере отырып, В. мен К.-ны кінәлі деп танып, әрқайсысын 7 жылдан бас бостандығынан айырды, – делінген сот хабарламасында.
Сот үкімі заңды күшіне енген жоқ.
