Семейде жөнделіп жатқан су құбырының шұңқырына автокөлік түсіп кетті (видео)
Абай ауданының әкімдігі Семейде Қабанбай батыр көшесінің бойындағы су құбырының бір бөлігі ауыстырылып, жөндеу жұмыстары жүріп жатқанын хабарлады.
Алматы, NEGE. «1 ақпан сағат 16:30 шамасында Қабанбай батыр көшесінде «ВАЗ» көлігін тізгіндеген 44 жастағы жүргізуші қауіпсіз қозғалыс жылдамдығын сақтамай, бұрын сумен жабдықтау жұмыстары жүргізілген шұңқырға аударылып кеткен. Оқиға салдарынан ешкім зардап шеккен жоқ. «ВАЗ» көлік құралының жүргізушісіне ҚР Әкімшілік құқық бұзу кодексінің 620-бабы бойынша хаттама толтырылды», деді Абай облысының полиция департаментінің өкілдері.
Бұл әрекет үшін оған ескерту беріледі немесе үш айлық есептік көрсеткіш мөлшерінде айыппұл салынады.
Әкімдіктегілер жөндеу жұмыстары жүріп жатқан жерге қоршаулар орнатылып, тиісті белгілер қойылғанын түсіндірді. Сондықтан көліктің шұңқырға түсіп кетуіне коммуналдық қызметтер кінәлі емес.
Жөндеу жұмыстары екі күнде аяқталады.