Семейде көшеде қарумен жүрген ер адам тұрғындарды шошытты
29 наурызда Семей қаласының полиция бөліміне 342-орамдағы сауда үйінің маңында "винтовка" ұстаған жігіттің қыдырып жүргені туралы хабарлама түскен. Оқиға орнына барған тәртіп сақшылары жас жігітті ұстаған, деп хабарлайды nur.kz.
Шығыс Қазақстан облысы полиция департаментінің баспасөз қызметінің мәліметінше, тәртіп сақшылары қолына "оптикалы көздеуішті винтовка" алып жүрген 17 жастағы қала тұрғынын тоқтатқан.
Әңгіме барысында жасөспірім ойыншық қаруды өзі ұсталған ауданнан сатып алғанын айтқан. Ал ақшаны оған туған күніне ата-анасы берген екен.
Ювеналды полиция тобының қызметкерлері заңды өкілдерінің қатысуымен кәмелетке толмаған баламен профилактикалық әңгіме жүргізді. Ойыншық винтовка туған күн иесіне қайтарылды.
