«Scat» ұшағынан тағы ақау шықты
«Scat» авиакомпаниясының «Нұр-Сұлтан – Атырау» бағытындағы ұшағынан ақау шықты. Бұл туралы Нұрсұлтан Назарбаев Халықаралық әуежайының баспасөз хатшысы Әнуар Шәлекенов мәлім етті.
Алматы, NEGE. «Нұрсұлтан Назарбаев Халықаралық әуежайында «Scat» авиакомпаниясының «Нұр-Сұлтан – Атырау» бағытындағы 765-ші рейсі кешігуде. Кесте бойынша сағат 13.55-те ұшып шығуы тиіс болатын. Алдымен сағат 18.00, кейін 19.30-ға дейін шегерілді. Енді түнгі сағат 00.00-ге дейін кешігетіні хабарланады. Ұшақтың кешігу себебі – әуе кемесінің ақауы», - деді Әнуар Шәлекенов.
Сондай-ақ мәлім етілгендей, «Scat» әуе компаниясының «Нұр-Сұлтан – Ақтөбе» бағытындағы тағы бір рейсі ұшып шығу кестесінен ауытқыған.
«Себеп – әуе кемесінің кешігіп келуі», - деп нақтылады Ә.Шәлекенов. «Жолаушылардан түсіністікпен қарауды сұраймыз. Себебі жолаушылардың қауіпсіздігі бірінші маңыздылықта. Рейстердің ұшып шығуы бойынша барлық сұрақтарды «Scat» авиакомпаниясына және осы мекеменің Call-орталығына жолдауды сұраймыз», - деп қосты ол.
