Саяси қуғын-сүргін құрбандарына қандай төлемдер қарастырылған?
Елімізде 2003 жылдан бері саяси қуғын-сүргін құрбандарына біржолғы өтемақы мен арнаулы мемлекеттік жәрдемақы ретінде 23,6 млрд теңгеден астам қаржы төленді. Бұл туралы Еңбек және халықты әлеуметтік қорғау министрлігінің баспасөз қызметі хабарлады.
АЛМАТЫ, NEGE. Министрлік мәліметінше, 2003–2024 жылдар аралығында республикалық бюджеттен 4,7 млрд теңге көлемінде біржолғы өтемақы төленген. Оның мөлшері 2 949 теңгеден (¾ АЕК) 393 200 теңгеге (100 АЕК) дейінгі аралықты құрайды. 2025 жылға бұл мақсатқа 1,2 млрд теңге бөлінуі жоспарланып отыр.
Сонымен қатар, саяси қуғын-сүргін құрбандарына 1,23 АЕК көлемінде арнаулы мемлекеттік жәрдемақы тағайындалады. 2025 жылы бұл сома 4 837 теңгені құрайды.
— 2005 жылдан 2024 жылға дейін 18,8 млрд теңге көлемінде арнаулы жәрдемақы төленген. Ал биылғы 1 мамырдағы жағдай бойынша 26 807 адам осы жәрдемақыны алып отыр, — деді министрліктің Әлеуметтік көмек департаментінің директоры Асқар Аймағамбетов.
Ақталған немесе саяси қуғын-сүргіннен зардап шеккен зейнеткерлер мен мүмкіндігі шектеулі азаматтар келесі әлеуметтік қолдауларға ие:
-
Еңбек өтіліне үш еселенген мерзіммен есептеу;
-
Ыңғайлы уақытта еңбек демалысын алу және қосымша екі апталық ақысыз демалыс құқығы;
-
Телефонды бірінші кезекте орнату;
-
Қарттар мен мүгедектер интернат-үйлеріне бірінші кезекте орналастыру;
-
Протездік-ортопедиялық бұйымдармен жеңілдікпен қамтамасыз ету;
-
Оңалтуға қатысты мәселелер бойынша тегін адвокаттық кеңес алу.
Жергілікті атқарушы органдар да қуғын-сүргінге ұшыраған азаматтарға қосымша материалдық және әлеуметтік көмек көрсетуге құқылы. 2024 жылы Саяси қуғын-сүргін және ашаршылық құрбандарын еске алу күні аясында жергілікті бюджеттен 223,8 млн теңгеге біржолғы көмек көрсетілген.
