Сәуірден бастап Астана мен Талдықорған арасында жолаушылар пойызы қатынайды
Көлік министрлігі «Астана – Талдықорған» бағыты бойынша жаңа теміржол қатынасы іске қосылатынын хабарлады.
Астана, NEGE. Мұндай шешімге тұрғындардың көптеген өтініші себеп болған.
Министрлік өкілдерінің нақтылауынша, бастапқы кезеңде екі жолаушылар вагоны бөлініп, олар №122/121 «Астана (Нұрлы жол) – Семей» пойызының құрамында күн ара қатынайды.
Ақтоғай станциясында бұл вагондар №631/632 «Ақтоғай – Талдықорған» пойызына тіркеледі.
«Бұл шара бүкіл маршрут бойымен үздіксіз әрі ыңғайлы қатынасты қамтамасыз етеді.
Тұрақты жолаушылар сұранысы қалыптасқан жағдайда вагондар саны мен қатынау жиілігі кезең-кезеңімен ұлғайтылады. Бұл маршрутты халықтың қажеттіліктеріне икемді түрде бейімдеуге мүмкіндік береді», – делінген хабарламада.
Пойыздың қатынауы сәуір айында Талдықорған қаласындағы жаңғыртылған теміржол вокзалының салтанатты ашылуына орайластырылған.
