«Сарыарқа» хоккей клубы Нығматулиннің меншігіне қалай өтті? – Облыс әкімі жауап берді

Жазда прокуратура құны 900 миллион теңге тұратын «Сарыарқа» клубын мемлекет меншігіне қайтарғанын хабарлады. Пресс-релизді оқығанда, «Клуб бір кездері заңсыз түрде жеке меншікке өткен бе?» деген ой туады. Мұның анық-қанығын біз Қарағанды облысының әкімінен сұрадық.

Облыс әкімі Е.Бөлекбаев клубтың Арғын Нығматулинге бес жыл мерзімге сенімгерлік басқаруға берілгенін, ал осы мерзім аяқталған соң оның клубты қайтарғанын айтты. Әкімнің сөзіне сенсек, клуб Нығматулинге заңды түрде өткен.

«Клуб сенімгерлік басқаруға берілді, инвестор клубты дамытады деген шартпен. Мерзім аяқталғаннан кейін ол клубты қайтарды. Шын мәнінде, бұл хоккей клубының өзге активтері, ғимараттары жоқ – тек клубтың өзі, құжаттар және бірнеше принтер... Арғын, иә, Арғын Нығматулин. Бес жыл бойы басқарды, мерзім өткен соң клубты қайтарып берді», – деп нақтылады Е.Бөлекбаев.

Сондай-ақ, Бөлекбаев хоккей және футбол клубтарын жекешелендіруге беру жоспары бар екенін хабарлады.

Арғын Нығматулин – Мәжілістің экс-спикері Нұрлан Нығматулиннің ағасы. Оны клубтың негізін қалаушы деп те атайды. 2018 жылы директорлық қызметтен кеткеннен кейін ол клубтың тұрақты тәлімгері әрі кеңесшісі болып қалды.