Сақтандыру жағдайын анықтау үшін тәуелсіз комиссия қажет пе?
Бүгін Мәжілістің Әлеуметтік-мәдени даму комитетінің мүшесі Зарина Қамасованың жетекшілігімен жұмыс тобының жетінші отырысы өтті. Медициналық қызметкерлерді кәсіби сақтандыру жүйесі шеңберінде емделушілерге төлемдерді жүзеге асыру үшін сақтандыру жағдайларын белгілеу жөніндегі тәуелсіз комиссияның жұмыс механизмін талқылады. Талқылау барысында тараптар ортақ келісімге келе алмады.
Алматы, NEGE. – Бастапқыда әзірлеушілер шағым түскен болса, шешімді емделушіні қолдау қызметі қабылдайды және ол қолдау қызметі болғанына қарамастан, ұйыммен жұмыс істейтін болады деп ұсынды. Сондықтан біз, депутаттар, емделушінің құқығын шынымен қорғайтын тәуелсіз комиссия болуы керек деген ұсыныс жасадық және оны бәрі қолдады. Енді оның қалай жұмыс істейтінін шешеміз. Бүгін өте ұзақ пікір таластырып, сақтандыру компанияларымен ортақ тіл таба алмадық. Біз сақтандыру жағдайларын белгілейтін тәуелсіз комиссия болғанын дұрыс деп санаймыз. Сонда емделуші уәкілетті органдарға бармай, ештеңе дәлелдемей-ақ, сол комиссияның шешімі бойынша төлем ала алады. Дегенмен сақтандырушылар бұл мәселені өз бетімен шешкісі келеді, – деді З.Камасова.
Нәтижесінде бұл түзету қайта пысықтауға жіберілді. Жұмыс тобының жетекшісі келесі отырысқа дейін талқылауға қатысушылардың барлығына сәйкес келетін бірыңғай ұстаным әзірлеуді тапсырды. Сақтандыру төлемдерінің мөлшері мен аудару тәртібіне және сақтандыру сыйлықақыларын анықтау әдістемесіне түзетулер енгізу қажет деген қорытындыға келді.
Жалпы заң жобасында медициналық қызметкердің науқастың денсаулығы мен өміріне байқаусызда зиян келтіруі ғана қарастырылған. Бұл ретте мәжілісмендер екі топтың да құқығын қорғауға тырысып жатыр. Мұндай сақтандыру Қазақстанда алғаш рет енгізіліп отыр, сондықтан депутаттарды ауқымды жұмыс күтіп тұр.
– Заң жобасы қызу талқыланып жатыр, біз бірнеше рет кездесіп, жұмыс топтарынан бөлек, министрліктермен, қоғам қайраткерлерімен кеңесіп жатырмыз. Барлық ұсынысты ескереміз. «Сақтандыру жағдайы» түсінігінің анықтамасы Үкіметтің қорытындысына ұсынылды. Сақтандыру жағдайын анықтау үшін тәуелсіз комиссия мен сақтандыру компанияларына медицина қызметкерінің құпия мәліметтерін беруге рұқсат беретін ереже қабылдадық. Осы заң жобасында жоқ бірқатар ұсыныстар енгізілді, – деді жұмыс тобының жетекшісі.
Еске сала кетейік, заң жобасы Мемлекет басшысының Ұлттық қоғамдық сенім кеңесінің үшінші отырысында алға қойған міндеттерін жүзеге асыруға бағытталған. Президент медицина қызметкерлерінің құқықтық және қаржылық қорғалуы мен жауапкершілігіне, оның ішінде кәсіби қызметіне кепілдік беретін жүйені әзірлеп, енгізуді тапсырған болатын. Осыған орай, депутаттар бұл түзетулерді қыркүйек айының соңынан бері талқылап жатыр.
