Сайлауға қатысты қаулыға өзгеріс енгізді
ҚР Орталық сайлау комиссиясы Саяси партияларды партиялық тізім бойынша сайланатын ҚР Парламенті Мәжілісінің және мәслихаттардың депутаттарын сайлауға жіберу туралы қаулысына өзгертулер енгізді.
Алматы, NEGE. «Adal» партиясы мен Қазақстанның халық партиясы республикалық, сонымен қатар өңірлік деңгейде қайта тіркеуден өтті. Сондай-ақ «Adal» партиясы Түркістан облысындағы филиалын қайта тіркеуден және Шымкент қаласындағы филалын есептік тіркеуден өткізгенін атап өткен жөн. Осыдан бұрын партияның бұл өңірлерде сайлауға қатысуға рұқсаты болмаған.
Осыған байланысты Орталық сайлау комиссиясының «Кейбір саяси партияларды партиялық тізім бойынша сайланатын ҚР Парламенті Мәжілісінің және мәслихаттардың депутаттарын сайлауға жіберу туралы» қабылданған қаулыны қайта қарау қажет»,- деді ҚР ОСК Төрағасы Берік Имашев. Осыдан кейін Орталық сайлау комиссиясы «Adal» саяси партиясы мен Қазақстанның Халық партиясын Қазақстан Республикасы Парламенті Мәжілісі мен мәслихаттары депутаттарын сайлауға қатысуға жіберу туралы қаулы қабылдады.
«Осылайша «Adal» саяси партиясы мен Қазақстанның Халық партиясы Қазақстан Республикасы Парламенті Мәжілісі мен мәслихаттары депутаттарын сайлауына жіберілді», - деді Берік Имашев.
