Садыр Жапаров: Асқар Ақаев халық алдында жіберген қателіктерін түзетті
Қазір "Құмтөрмен" бітімгершілік келісімге қатысты құжаттарға қол қою туралы келіссөздер жүргізілуде. Қырғызстанның бұрынғы президенті Асқар Ақаев өз қателіктерін халық алдында түзетті. Елдің қазіргі басшысы Садыр Жапаров осындай мәлімдеме жасады
.
Алматы. NEGE. Бұл туралы 24.kg хабарлады. Садыр Жапаровтың айтуынша, қазір "Құмтөрмен" бітімгершілік келісімге қатысты құжаттарға қол қою туралы келіссөздер жүргізілуде.
"Көктемге дейін бұл процесті аяқтаймыз. "Құмтөр" бізге ауысты. Асқар Ақаевтың айғақтарының арқасында осындай нәтижеге қол жеткіздік. Қысқасы, ол өз қателіктерін халық алдында түзетті. Сонымен қатар басқа да саясаткерлер мен шенеуніктерден жауап алу кезінде алынған ақпарат та оң ықпалын тигізді. Бұған қатысты мәліметті кейін егжей-тегжейлі айтып беремін", – деді Садыр Жапаров.
8 шілдеде Қырғызстанның Ұлттық қауіпсіздік мемлекеттік комитетінің басшысы Камчибек Ташиев республиканың бұрынғы президенттері Асқар Ақаев пен Құрманбек Бакиевке "Құмтор ісі" бойынша халықаралық іздеу жарияланғанын хабарлады. Сондай-ақ Қырғызстанның бұрынғы премьер-министрлері Апас Жұмағұлов, Өмірбек Бабанов және Игорь Чудинов, Бұрынғы мемлекет басшысы Сооронбай Жээнбековтың ағасы, парламенттің экс-спикері Асылбек Жээнбеков және Бакиевтің кіші ұлы Максим Бакиевке іздеу жарияланды.
Асқар Ақаев 1991-2005 жылдар аралығында Қырғызстан президенті болды. Халық оның отставкасын талап етіп, митингке шыққаннан кейін, ол қызметінен кетті. 2005 жылдан бері ол Ресейде тұрады.
