Сәби саудасы: Қызылордада қоғамдық қордың жетекшісі ұсталды

Астана, NEGE. Сәуір айында ел аумағында ІІМ тарапынан кезекті ауқымды «STOP-трафик» жедел-профилактикалық іс-шарасы ұйымдастырылды. Нәтижесінде адам саудасына қатысты 41 қылмыс тіркеліп, оның ішінде кәмелетке толмағандарға қатысты 9 дерек анықталды.

Қызылорда облысында жаңа туған сәбиді сату схемасы әшкереленді.

«25 жастағы әйел бала туғанға дейін және туғаннан кейін мамандандырылған қоғамдық қорда болған. Оның баладан бас тартуына байланысты қор жетекшісі делдал ретінде әрекет етіп, сәбиді асырап алу мақсатында облыстың 50 жастағы тұрғынына бір миллион теңгеге сатуды ұсынған», – деді ІІМ Ұйымдасқан қылмысқа қарсы күрес департаментінің өкілі Қуандық Алпыс.

Үшеуі де уақытша ұстау изоляторына қамалды.

• Тақырыпқа орай: Тастанды тағдыр: «Үміт бесігіне» қанша ана сәбиін қалдырып кетті?

Бұған дейін Түркістан облысында жас келіншек сәбиін 800 мың теңгеге сатпақ болған. Ол жүктілігінің соңғы кезеңінде әлеуметтік желілер арқылы баласын сатып алатын адам іздеген.