Рудныйда 19 жастағы жігіттің өліміне күдікті жасөспірімдер ұсталды
Рудный қаласында Қазақстан бойынша іздеуде жүрген екі кәмелетке толмаған жасөспірім қолға түсті, деп хабарлады қала әкімі Виктор Ионенко.
Алматы, NEGE. Әкімнің айтуынша, 2008 және 2009 жылы туған жасөспірімдер аса ауыр қылмысқа қатысы бар деген күдікке ілінген. Аталған дерек бойынша 23 қаңтар күні Қазақстан Республикасы Қылмыстық кодексінің 99-бабы («Адам өлтіру») аясында қылмыстық іс қозғалған.
Қала басшысы қаза болған жасөспірімнің отбасы мен жақындарына көңіл айтып, күдіктілердің тиісті тергеу органдарына берілгенін жеткізді.
Қазір оқиғаның себептері мен барлық мән-жайын анықтау үшін қажетті тергеу және жедел-іздестіру шаралары жүргізілуде.
Бұл қылмыстық іс Қазақстан Республикасы Ішкі істер министрлігі мен Қостанай облысы Полиция департаментінің ерекше бақылауында.
23 қаңтар күні Рудный қаласындағы көпқабатты үйлердің бірінен 19 жастағы жергілікті тұрғынның мәйіті табылған болатын. Алдын ала мәлімет бойынша, марқұмның денесінен пышақ жарақаттары табылған.
