Робототехникаға қызығушылар үшін Almaty TechCup-2023 чемпионаты басталды
Робототехникаға қызыққан балалар Алматыда бас қосты. Оқушылар мен студенттер инновациялық жобаларын таныстырып, өзара бақ сынауды, деп хабарлайды Хабар-24.
Алматы, NEGE. Үздіктер ақшалай сыйлық пен білім гранттарына ие болады. Алматының ашық чемпионаты осымен тоғызыншы рет ұйымдастырылып отыр. Дәстүрлі жарысқа республиканың әр өңірінен жеңімпаз атанған 2 мыңнан аса оқушы қатысуда. Олар жас ерекшеліктеріне қарай бақ сынайды.
Бір тобы дрондарды ұшырып жарысса, екіншілері роботтарды құрастырып, арнайы тапсырмаларды орындайды.
Чемпионаттың мақсаты STEM дағдыларын дамыту. Оқушылар мен студенттердің цифрлық технологиялар туралы білімін жетілдіріп, ғылым мен техникаға деген қызығушылығын күшейту.
Чемпионатқа жолдама алған 140 команда екі күн бақ сынайды. Олар әр аталым бойынша марапатталады.
Жарыстың жүлде қоры 10 миллион теңге. Оған қоса, жеңімпаздарға Алматыдағы техникалық университеттерден грант беріледі. Сондай-ақ шет елдерде өтетін чемпионаттарға жолдама алады.
