Рыбакина финалға шыға алмады
Қазақстанның бірінші, әлемнің 21-ракеткасы Елена Рыбакина Истбурн (Ұлыбритания) WTA 500 турнирінің финалына шыға алмай қалды.
Алматы, NEGE. Рыбакина жартылай финалда 2017 жылғы Ролан Гаррос турнирінің жеңімпазы, латвиялық, әлемнің 43-ракеткасы Елена Остапенкомен шеберлік байқасты.
Латвиялық теннисші 6:4, 6:1 есебімен жеңіске жетті. Бір жарым сағатқа жуық уақытқа созылған матчта Е.Остапенко 3 эйс жасап, 13 брейк-пойнттың бесеуін пайдалана алды.
Қазақстандық спортшы 6 эйске қол жеткізгенімен, 9 брейк-пойнттың екеуін ғана өз есебіне жазды.
Е.Остапенко финалда әлемнің 27-ракеткасы, эстониялық Анетт Контавейтпен бас жүлдені сарапқа салады.
