Ресей жүк көліктеріне арналған міндетті QR-код енгізді
1 маусымнан бастап Ресей Федерациясы шекарасында тауарларды күтуді растау жүйесі (ТКРЖ) іске қосылды.
Астана, NEGE. Мемлекеттік кірістер комитетінің хабарлауынша, енді тауарларды автомобиль көлігімен жеткізу кезінде жүкті қабылдап алушы тарап Ресей Федерациясында алдағы жеткізілім туралы құжатты алдын-ала рәсімдеп, QR-код алуы қажет. Бұл QR-код жүргізушінің қолында болуы керек және бақылаушы органдар сұраған кезде көрсетуі тиіс.
Расталған QR-код болмаған жағдайда, Ресей Федерациясына кіруге тыйым салынуы және жүк көлігін кері қайтарылуы мүмкін.
Осыған байланысты Мемлекеттік кірістер комитеті жүргізушілерге мына жайттарды ескертеді:
- Ресейлік алушыдан ТКРЖ шеңберінде ресімделген QR-кодтың болуын алдын ала нақтылау;
- өткізу пунктіне барғанға дейін QR-кодты тексеру;
- басып шығарылған немесе электронды түрде QR-код болуы керек;
- QR-кодтағы мәліметтерді тауарға ілеспе құжаттармен (тауар, саны, көлік құралы, алушы) салыстырып тексеру;
- құжаттарды дұрыс ресімдемеген жағдайда шекарадан өту уақытының ұзаратынын ескеру қажет.
Ведомство өкілдері тасымалдауды жоспарлау кезінде осы өзгерістерді ескеруді сұрайды.
