Дүние
Ресей Украина астанасына жаппай әуе соққысын жасады
Ресей 28 қыркүйекке қараған түні Украина аумағына жүздеген дрон мен зымыран жіберді.
Алматы, NEGE. Жойқын соққы ел астанасы – Киевке жасалды. Ресми деректерге сүйенсек, кемінде төрт адам қаза тауып, ондаған адам жараланды. Бұл – ауқымы жағынан соғыс басталғаннан бергі ең ірі шабуылдардың бірі.
Жауап ретінде Польша уақытша екі оңтүстік-шығыс қаласының әуе кеңістігін жапты және қауіп толық жойылғанша жойғыш ұшақтарды әуеге көтерді.
Украина әскері барлығы 595 дрон мен 48 зымыран ұшырылғанын, оның ішінде әуе қорғаныс күштері 568 дрон мен 43 зымыранды атып түсіргенін хабарлады. Негізгі соққы бағытында Киев тұрды.
Президент Владимир Зеленскийдің айтуынша, шабуыл 12 сағаттан астам уақытқа созылып, кардиологиялық клиникаға, зауыттарға және тұрғын үйлерге зақым келтірген.
– Шешуші әрекеттердің уақыты баяғыда жетті. Біз АҚШ, Еуропа, G7 және G20 тарапынан күшті жауап күтіп отырмыз, – деп жазды ол Telegram-да.