«Ресей ұшақ апаты үшін кешірім сұрауы керек» – Әзербайжан депутаты

Алматы, NEGE. «Ұшақ Ресей аумағында, Грозный аспанында атып түсірілді. Ал мұны жоққа шығару мүмкін емес. Мұны істегендер қылмыстық жауапкершілікке тартылып, өтемақы төлеуі тиіс. Егер бұл талабымыз орындалмаса, онда, әрине, қарым-қатынас басқа деңгейге өтеді», - деді Мәжілістің халықаралық қатынастар комитетінің мүшесі, депутат, саясаттанушы Расим Мұсабеков Әзірбайжанның Turan басылымына берген сұхбатында. 

Ол сондай-ақ «Ресейдегі кейбіреулердің қылмысты жасыру үшін бұқаралық ақпарат құралдарында белгілі бір әрекеттерді жасап жатқанын» атап өтті. Депутаттың айтуынша, бұл дұрыс емес.

Ол 2020 жылы 44 күнге созылған соғыс кезінде Ресейдің әскери тікұшағы атып түсірілгенде Әзірбайжан тарапы кешірім сұрап, кінәлілер жауапқа тартылатынын және өтемақы төлейтінін айтқанын еске салды.

«Өркениетті қарым-қатынас осындай болады. Егер әуе қорғанысы жұмыс істеп тұрса, онда әуежай жабылуы керек еді. Мұнда ешкім ұшпауы үшін алдын ала хабарлама берілуі тиіс болған. Сондықтан кінәлілер жауапқа тартылуы керек», - деді Мұсабеков.

Мұсабеков Әзірбайжан парламентіне төрт рет сайланған. Ол Мәжлістің халықаралық қатынастар және парламентаралық байланыстар комитетінің қатарында, сондай-ақ ТМД Парламентаралық Ассамблеясындағы Әзірбайжан Парламенті делегациясының мүшесі. Сонымен қатар, Мұсабеков Әзірбайжан Президенті жанындағы Стратегиялық зерттеулер орталығы шығаратын аналитикалық журналдың редакциялық алқасының мүшесі.

2024 жылы 25 желтоқсанда Ақтау қаласының маңында Баку – Грозный бағытында ұшып бара жатқан Azerbaijan Airlines әуекомпаниясының Embraer-190 әуе кемесі апатқа ұшырады.  

Ұшақ апаты салдарынан 29 адам ауруханаға жатқызылды, 38 адам қаза тапты. Әзербайжанның 37 азаматының 14-і аман қалды, 23-і қаза тапты. Қырғызстанның 3 азаматының бәрі дін-аман. Ресейдің 16 азаматының жетеуі қаза тапты. Қазақстанның 6 азаматының барлығы көз жұмды.