Ресей музейлеріндегі қазаққа тиесілі жәдігерлер елге қайтарылады
Ресей музейлеріндегі қазаққа қатысты жәдігерлерді қайтару мемлекетаралық келісім аясында пысықталады. Бұл жайында Мәдениет және ақпарат министрлігінен мәлім етті, деп хабарлайды Kazinform.
Алматы, NEGE. «Түрлі себептермен шет мемлекеттерге кеткен тарихи жәдігерлерді қайтару мәселесі ұлтымыздың рухани жаңғыруына ықпал ететіндігі анық. Министрлік көрсетілген мәселенің маңызын ескере отырып, отандық тарих, мұрағат, мәдениет саласындағы ғалымдар және шығармашылық интеллигенция өкілдерімен бірлесіп, шетел асқан құндылықтарымыз бен артефактілердің тізімін жасау мәселесін пысықтады», - деп атап өтеді министрліктен.
Ведомство мәліметінше, аталған тізімге көршілес Ресейдегі федералдық музейлердің қорынан жәдігерлер енгізілген.
«Музей саласындағы сарапшылардың мәліметінше, бүгінде Ресей аумағындағы музейлерде XIX-XX ғасырларда Қазақстан аумағында жүргізілген ғылыми экспедициялар кезінде сатып алынған немесе сыйға тартылған экспонаттар сақталған. Өз кезегінде көп жағдайда бұл заттар қазақ халқының мемлекет ретіндегі тарихында маңызды рөл атқарған тұлғаларға тиесілі. Сондықтан бұл жәдігерлерді немесе олардың көшірмесін елге қайтару мәселесі сол мемлекеттің заңнамасымен екі елдің арасындағы мемлекетаралық келісім аясында пысықталады», - деді министрліктен.