Ресейде жеке бункерлерге сұраныс артып жатыр
2022 жылы Ресейде жеке бункерлерге сұраныс артқан. Әсіресе, ішінара мобилизация жарияланғаннан кейін жеке бункер сатып алушылар көбейген.
Алматы, NEGE. BunkerHouse жобасының негізін қалаушы Никита Малежик 21 қыркүйектен кейін бункерлерге сұраныс 430%-ға өскенін айтты. Мұндай жағдай Ресей Украинаға басып кірген кезде болмаған.
Қазір дүрбелең басылып, қызығушылық төмендеген. Десе де жеке бункер алуға ниетті адамдар бар көрінеді.
«Спецгеопроект» компаниясы бункерлер салуға өтініштердің шекаралас аймақтардан көптеп түскенін хабарлады. Кейбіреулері жертөлелерді арнайы жасақтап жатыр.
Жеке бункердің ең төменгі құны 1 миллион рубльден басталады. Баға тұтынушының қалауына және олардың қаражатына байланысты қымбат болуы да мүмкін.
