Ресейде террорлық әрекеттер қайта бас көтерді
Бүгін Мәскеудің аудандық 10 сотының ғимаратын, 25 метро стансасын жарып жіберу туралы анонимді хабарлама түсті. 9 желтоқсан күні Ресей астанасының алты супермаркеті, бірнеше мектебі, екі сот мекемесі мен Христос Құтқарушы храмын жарамыз деген осындай қоқан-лоққыға толы хабарлама алған.
Алматы, NEGE. Дәл осындай жару туралы қоңырау желтоқсанның басында «Домодедово» аэропортына да шалынған. Бұл ақпараттар расталмаса да, Мәскеу құқық қорғау органдары мен қала тұрғындарының үрейін ұшыруда. Қазір осы қоқан-лоққылардың кешегі сот үкіміне қатысы тексеріліп жатыр.
Кеше, 10 желтоқсан күні Санкт-Петербургте 2017 жылы метрода терракт ұйымдастырушыларға үкім шықты. Жарылыстың негізгі фигуранты – қырғызстандық Аброр Азимов жарылысты ұйымдастырды және қаржыландырды деп айыпталып, өмір бойына бас бостандығынан айырылды. Қалған 10 айыпкер 19-28 жылға сотталды. Сондай-ақ, барлық кінәлілерге 500-800 мың сомнан айыппұлдар салынды.
Естеріңізге сала кетсек, 2017 жылдың 3 сәуірінде Санкт-Петербург метросында болған жарылыстан 103 адам зардап шегіп, 16 адам көз жұмған. Тергеу ісінің анықтауы бойынша, қырғызстандық Акбаржон Джалилов өзін өзі жарып жіберген болатын.
