Ресейде қарттар үйіндегі өрттен 20 адам қаза тауып, жетеуі хабарсыз кетті
Кемеровода Таврическая көшесіндегі екі қабатты қарттар үйі өртенді, деп хабарлайды ҚазАқпарат.
Алматы, NEGE. Өрт салдарынан 4 адам қаза тауып, екі қарт жарақат алған.
Өрт туралы сигнал Мәскеу уақытымен 22:21-де түскен. Өрт сөндірушілер келген кезде үйдің шатыры отқа оранған.
Өрт алаңы 180 шаршы метрді құрады. Өрт туралы хабарлама ТЖМ-не кеш түскендіктен, тілсіз жау біршама өршіп кеткен.
Өрт сөндіру ісіне 80-нен астам адам, 28 техника жұмылдырылды.
Кейінірек Ресей ТЖМ өрт салдарынан қаза тапқандар санының төрттен 13 адамға дейін өскенін хабарлады. Соңғы мәлімет бойынша, төтенше жағдайдан 20 адам көз жұмды.
Жеті адамның тағдыры белгісіз. Күйік шалған екі адам ауруханаға жеткізілді, олардың жағдайы ауыр. Тағы төртеуі амбулаторлық емдеуге жіберілді.
Бұл Кемероводағы қарттар үйіндегі алғашқы өрт емес.
8 қаңтарда екі қабатты «Алтын ғасыр» пансионатының бірінші қабатында өрт шықты. 48 адам эвакуацияланып, төртеуі қайтыс болды.
Өрт сөндіру қызметі Ресейдегі жеке үйлерде көптеген қарттар үйі жұмыс істейтінін айтты.
Олар реестрде тіркелмегендіктен, өрт қауіпсіздігі бойынша тексеруден өткізуге болмайды, ал өрт сөндіру инспекторларының тұрғын үйге кіруіне рұқсат жоқ.
