Дүние
Ресей S-400 зениттік зымырандарын Үндістанға сатады
Ресей Үндістанға арналған S-400 зениттік зымыран кешендерін шығара бастады. Бұл туралы РИА Новостиге берген сұхбатында Ресейдің өнеркәсіп және сауда министрі Денис Мантуров айтты.
Алматы, NEGE. Ол Almaz-Antey концернінің Үндістанға S-400 зымырандарын шығарумен айналысып жатқанын мәлімдеді. «Ресей қаруды келісім-шартта белгіленген мерзімде жеткізеді» деді ол.
Өткен жылдың қазан айында Үндістан сыртқы істер министрі Субраманям Джайшанкар Вашингтонға сапары кезінде Ресейден S-400 зымырандарын сатып алу құқығын қорғаған. Сол сапарында ол «Ешбір ел Үндістанға қару-жарақты қайдан алу қажеттігін міндеттей алмайды» деген еді.
Ресей қаруын Үндістанға жеткізу 2023 жылдың сәуіріне дейін аяқталуы тиіс. Сонымен бірге, Ресей вице-премьері Юрий Борисов АҚШ бұл келісімді бұзуға белсенді түрде тырысып жатқанын айтты. Ресей мен Үндістан арасындағы келісімшарт 2018 жылдың 5 қазанында Ресей басшысы Владимир Путиннің Нью-Делиге сапары кезінде жасалған. Келісім құны 5 миллиард доллардан асады.