Референдумға қанша қаржы жұмсалатыны белгілі болды
Саяси науқанға Үкімет резервінен 20,8 млрд теңге бөлу жоспарланып отыр.
Астана, NEGE. Орталық сайлау комиссиясы алдағы референдумды өткізуге жұмсалатын шығын көлемін жария етті. Комиссия мүшесі Михаил Бортниктің мәліметінше, алдын ала есеп бойынша саяси науқанға 20,8 млрд теңге жұмсалуы мүмкін. Оның 75% комиссия мүшелерінің еңбекақысын өтеуге бағытталған.
«Айта кетейін, бұл қаражат 2026 жылға арналған республикалық бюджетте қарастырылмаған. Ол Үкіметтің резервінен бөлінеді. Нақты шешімді жақын арада шығаруға тырысамыз», – деді Бортник.
Еске салсақ, 2024 жылғы 6 қазанда АЭС салу мәселесіне қатысты өткен бүкілхалықтық референдумға 15,5 млрд теңге бөлінген еді. Ал 2022 жылғы 5 маусымда Конституцияға өзгерістер енгізу жөніндегі референдумды ұйымдастыруға бюджеттен 16,5 млрд теңге қарастырылып, оның 1,6 млрд теңгесі игерілмей, қазынаға қайтарылған.
