Разия Төлеуқызы қайтыс болды
Футболдан Қазақстан әйелдер құрамасының бас бапкері Разия Төлеуқызы Нүркенова 52 жастан асқан шағында қайтыс болды, – деп хабарлайды федерацияның баспасөз қызметі.
Алматы, NEGE. «Қазақстан футбол федерациясы Разия Нүркенованың мезгілсіз қайтыс болуына байланысты қатты қайғырады. Спорт мамандары мен жанкүйерлердің ортасында Разия Нүркенова еліміздің тәуелсіз тарихындағы Қазақстан құрамасының алғашқы шабуылшысы ретінде кең танымал», – дейді федерация өкілдері.
Рәзия Төлеуқызы қарағандылық «Олимп» әйелдер футбол клубында спорт мансабын бастап, 1987-1991 жылдардың аралығында ойнады.
1992 жылы Нүркенова Ресейдің Самара қаласының ЦСКА ВКС футбол клубынан шақырту алады. 2001 жылға дейін шабуылдаушы жартылай қорғаушы болып ойнады. Разия Төлеуқызы Қазақ КСР, КСРО, ТМД, Қазақстан және Ресей құрамаларына да шақырылған.
Қазақстан футбол федерациясының ұжымы Рәзия Төлеуқызы Нүркенованың өмірден мезгілсіз өтуіне байланысты қатты қайғырып, марқұмның отбасына, туыстары мен жақындарына көңіл айтады.
