QR-код арқылы алуға болатын мемлекеттік қызметтердің тізімі жарияланды
Бүгін ҚР Цифрлық даму, инновациялар және аэроғарыш өнеркәсібі министрі Асқар Жұмағалиев халыққа есеп беру кездесуінде egov.kz порталынан QR-код арқылы алуға болатын мемлекеттік қызметтердің тізімін жариялады, деп хабарлайды ҚазАқпарт.
Алматы, NEGE. Министрдің айтуынша, QR-код арқылы алуға болатын қызметтерді осы айда ұсыну үшін техник мамандар жұмыс істеуде.
QR-код арқылы алуға болатын алғашқы мемлекеттік қызметтер: некені тіркеу, баланың туғанын тіркеу, балабақша кезегіне қою, заңды тұлғаны тіркеу, салық есебін қабылдау (250 форма).
«Бұл қызметтерді компьютер арқылы алу барысында ЭЦҚ-ға қол қою кезінде QR-кодты сканерлеп, қызметті eGov mobile қосымшасы арқылы алуға сұрау жіберуге болады. Ол үшін компьютеріңізге ЭЦҚ-ны пайдалану үшін қосымша бағдарлама орнатудың қажеті жоқ», - деп атап өтті Асқар Жұмағалиев.
Осылайша, азамат eGov.kz порталынан қызметтерді алу барысында «QR-code арқылы қол қою» функциясын таңдай алады. Содан соң eGovMobile қосымшасын пайдаланып, мониторда пайда болған кодты сканерлейді. Осы айдың соңында кейбір қызметтерді QR-код арқылы алу мүмкіндігі іске асырылады. Алдағы уақытта QR-кодтың көмегімен алуға болатын қызметтердің қатары көбейеді.
«eGov mobile» қосымшасы App Store және PlayMarket платформаларында бар. Сондай-ақ, аталған мобильді қосымшада сұранысқа көп ие қызметтер мен сервистердің 60 түрі қолжетімді. Азаматтың жеке куәлігі секілді «цифрлық құжаттары» да енгізілген. Мобильді қосымшаны толыққанды пайдалану үшін ЭЦҚ-ның болуы шарт және мобильдік азаматтар базасында тіркелуіңіз керек.