Путин ҰҚШҰ елдеріне ресейлік қаруды сатып алуды ұсынды
Қырғызстанда өтіп жатқан ҰҚШҰ саммитінде Ресей президенті Владимир Путин ұйым елдерін «заманауи ресейлік қарумен» қамтамасыз етуді ұсынды, – деп жазады Настоящее время басылымы.
Астана, NEGE. Ол ресейлік қару-жарақ өз мүмкіндігін дәлелдеді деп санайды.
«Ұжымдық күштерді қазіргі заманғы ресейлік қару-жарақ пен әскери техника үлгілерімен жарақтандырудың ауқымды бағдарламасын іске қосуды ұсынамыз. Бұл үлгілер өз тиімділігін нақты әскери қимылдар барысында дәлелдеді», – деді ол.
Путин нақты қандай қару түрлерін сатып алуды ұсынатынын атаған жоқ, алайда ұйымның авиациялық күштерін және әуе шабуылына қарсы қорғаныс жүйесін дамытуға ерекше назар аудару керектігін айтқан.
Сарапшылар Тәжікстан, Қазақстан және Қырғызстан басқа елдерден сатып алынған дрондарды қолданып жүргенін атап өткен. Олардың сөзінше, қару-жарақ нарығында Ресей Қытайдан, Израильден және Түркиядан ұтылып жатыр.
Мысалы, Қырғызстан түріктің «Байрактар» TB2 орта биіктіктегі соққы дрондарын және Қытайлық Zhongtian ZhiControl компаниясымен бірге дрон өндірісін бастамақ.
Қазақстанда Turkish Aerospace Industries компаниясының көп мақсатты Anka дрондары бар, сонымен қатар 2022 жылғы мамырдан бастап Түркиямен бірге өз территориясында дрон өндірісін ұйымдастыру туралы келісімге келген.
Тәжікстан да өз елінде дрон өндіруді жоспарлап отыр, бірақ ол ирандық дрондар болмақ.
