Путин мен Трамптың телефон арқылы сөйлескені рас па? Кремль пікір білдірді
Кремльдің баспасөз хатшысы Дмитрий Песков 11 қарашада өткен брифингте The Washington Post басылымының Дональд Трамптың Владимир Путинмен телефон арқылы сөйлескені туралы ақпаратты жоққа шығарды.
Алматы, NEGE. Кремльдің хабарлауынша, Путин мен Трамптың телефон арқылы сөйлесіп, Украинадағы соғысты талқылағаны туралы ақпарат «ойдан құрастырылған».
«Ешқандай әңгімелесу болған жоқ. Тіпті, беделді басылымдарда жарияланатын ақпараттың сапасы осындай. Бұл шындыққа жанаспайтын жалған ақпарат», - деді Песков.
Журналистер Кремльдің баспасөз хатшысынан: «Ресей президенті АҚШ-тың жаңа сайланған президентімен жақын арада қандай да бір байланыс орнатуды жоспарлап отыр ма?», - деп сұрады. Песков әзірге нақты жоспар жоқ екенін жеткізді.
Естеріңізге сала кетейік, The Washington Post басылымы Трамп Путинге қоңырау шалып, Украинадағы жағдайды талқылады, деп хабарлаған болатын. The Washington Post жариялаған ақпарат көздерінің айтуынша, Трамп Путинді шиеленісті ушықтырмауға шақырып, Еуропада америкалық әскери базалардың жеткілікті екенін еске салған.
