Прокурорлар Перизат Қайратты 10 жылға бас бостандығынан айыруды сұрады
Прокурорлар Перизат Қайратқа 10 жылға бас бостандығынан айыру жазасын, мүлкін тәркілеуді және 10 жылға қайырымдылықпен айналысу құқығынан айыруды сұрады.
Астана, NEGE. Мемлекеттік айыптаушы Арман Кезекеннің айтуынша, кінәсін жеңілдететін ешбір мән-жай анықталмаған. Керісінше, қылмыс Төтенше жағдай кезінде жасалғаны жазаны ауырлататын жағдай ретінде бағаланады.
Перизат Қайрат пен оның анасы Гайни Алашбаева үш эпизод бойынша алаяқтық жасады деп айыпталып отыр. Олар балаларға арналған реабилитациялық орталық салуға, Палестина тұрғындарына көмектесуге және Қазақстандағы су тасқынынан зардап шеккен азаматтарға жәрдем беруге деп қаражат жинаған.
Айыптау тарабының мәліметінше, олар қайырымдылық желеуімен жиналған шамамен 3,5 миллиард теңгені иемденіп, кейін бұл қаражатты заңдастырып жіберген.
Өз кезегінде айыпталушылар кінәсін мойындаған жоқ. Перизат Қайрат бұл істі «тергеушілердің фантазиясы»деп атады.
