Прокурор марқұм Айзат Жұманованың күйеуін 15 жылға соттауды сұрады
Жетісу облысының қылмыстық істер жөніндегі мамандандырылған ауданаралық сотында Айзат Жұманованың өліміне қатысты іс бойынша басты сот отырысы өтіп жатыр.
Алматы, NEGE. Прокурор сотта Айзат Жұманованың өліміне күдікті деп танылған күйеуі Айбар Жанболатты 15 жылға бас бостандығынан айыру жазасын тағайындады сұрады. Сондай-ақ жазаны қауіпсіздігі орташа түзеу мекемесінде өтеуді ұсынды.
Мемлекеттік айыптаушының айтуынша, бұл істе шешім қабылдау кезінде эмоцияға немесе қоғамдық қысымға емес, тек заң талаптарына сүйену маңызды. Сот тергеуі қылмыстық-процестік заңнамаға толық сәйкес жүргізілген, қорғау мен айыптау тараптарының құқықтарын жүзеге асыруына барлық жағдай жасалған.
Істе жазаны жеңілдететін мән-жайлар анықталмаған. Ал сотталушының кәмелетке толмаған қызына қамқоршылық нағашы апасына берілгені айтылды. Сонымен қатар, айыптаушы тарап жазаны ауырлататын мән-жай ретінде қылмыс жасалған сәтте сотталушының мас күйде болғанын көрсетті.
-
Тақырыпқа орай: «Қойшы, сені сүйемін ғой»: Күйеуінің қолынан қаза тапты делінген Айзаттың өліміне қатысты не белгілі?
Алдыңғы сот отырыстарында куәлік еткен облыстық аурухана реаниматологы Мақсат Серікқанұлы Айзат Жұманованың реанимацияға өлім ауызында келгенін айтқан еді.
Айзат Жұманова сағат 02:35-те ауруханаға жеткізілген. Қабылданған реанимациялық шараларға қарамастан, сағат 03:05-те өлімі тіркелген.
