Президент: Ерте ме, кеш пе, теңге бағамы тұрақтанады
Мемлекеттік органдар валюта нарығына қатысты заңсыз әрекеттердің жолын кесетін болады, деп мәлімдеді Қазақстан президенті Қасым-Жомарт Тоқаев.
Алматы, NEGE. «Теңгенің долларға қатысты бағамы валюта нарығындағы сұраныс пен ұсынымның азды-көптігіне қарай түзелетіні белгілі. Сондықтан құзырлы органдар валюта нарығына қатысты заңсыз әрекеттердің жолын кесетін болады. Алдағы уақытта Ұлттық банк теңгенің еркін бағамы қағидатын ұстанып, Үкіметпен бірлескен жұмысын жалғастыра береді», - деді Тоқаев сейсенбіде мемлекеттік басылымның сұрағына берген жауабында.
Ол квазимемлекеттік секторға экспорттан түсетін табыстың бір бөлігін ішкі нарықта сатуды тапсырғанын еске салды.
«Сондай-ақ олар (квазимемлекеттік сектор – ҚазТАГ) шетел валютасындағы депозиттерін еліміздің қаржы жүйесіне қайтаруда. Бұл қаражат нақты жобаларға жұмсалады. Осы және басқа да шаралар доллар тапшылығын болдырмау үшін жасалып отыр. Әрине, нарықтық экономика жағдайында мұндай мәселені реттеу оңайға соқпайды. Оның үстіне, еліміздегі шетел валютасының басым бөлігі шикізатты сатудан түсетіні жасырын емес. Ерте ме, кеш пе, теңге бағамы тұрақтанады. Бірақ бұған сыртқы факторлар әсер етпей қоймайды», - деді Тоқаев.
