Президент басшыларды НЕГЕ шегірткеге теңеді?
Бүгін Президент Қ.Тоқаев кадр резервіндегі 300 жаспен кездесуінде мемлекеттік басқару жүйесіндегі «командамен ауысу» мәселесін қозғады.
Алмты, NEGE. Ол кейбір мемлекеттік қызметкерлер ескі жүйеден шыға алмай, елдегі жаңғыру процестерін тежеп отырғанын мәлімдеді. Президенттің айтуынша, мемлекеттік қызметте командамен ауысу деген мәселе шықты. «Мемлекеттік органдардағы ауысу көрсеткіші, жалпы алғанда, норма шегінде – 6-10%. Шын мәнінде, министр немесе әкім ауысқан кезде, кадрлық құрам да әжептәуір өзгеретіні баршаға аян», – деді Тоқаев.
Президент мемлекеттік басқару жүйесінде меритократия принциптері үнемі сақтала бермейтінін атап өтті.
«Әлі күнге дейін қызметте таныс арқылы, ықпалды қамқоршылар арқылы көтерілу жағдайлары кездеседі. Бұл шындық қой. Мұны бәріміз де білеміз. Бұған жол беруге болмайды. Мұндай жүйені қатаң сынға алып, анализ жүргізген жөн. Қоғамның пікірін де ескеру қажет», – деді Мемлекет басшысы.
Оның айтуынша, кейбір мемлекеттік қызметкерлер ескі жүйеден шыға алмай, елдегі жаңғыру процестерін тежейді.
«Ведомстволар мен бөлімшелердің басшылары шегіртке сияқты бір қызметтен басқасына секіріп жүр. Сол себепті Қазақстанға қоғамның талаптарына жауап беретін тиімді әрі әділ мемлекеттік басқару моделі қажет», – деді президент.
Кадрлық резервтік тізімге 300 адам еніп отыр. Кадрлық резервтің мақсаты – білікті басшылардың жаңа буынын қалыптастыру және жастар үшін әлеуметтік сатының ұтымды жүйесін құру. Жоғары әкімшілік және саяси лауазымдар босай қалған жағдайда, президенттік резервке іріктелген жастардың кандидатурасы қаралады.
