Президент заңсыз активтерді елге қайтару туралы: Асыра сілтеуге болмайды
Үкіметтің кеңейтілген отырысында Мемлекет басшысы шетелге заңсыз шығаралған акивтерді қайтарудың маңызына тоқталды. Сондай-ақ, бұл мәселеде «артық кетуге болмайтынын» да ескертті.
Астана, NEGE. Президенттің пайымдауынша, активтерді елге қайтару жұмысында тым белсенді болу шетелдік инвесторларды үркітуі мүмкін екен.
– Инвестицияның тағы бір көзі заңсыз активтерді қайтару болуы керек. Бұл жұмыстың тізбегін бірнеше мәрте нақтылап бергенмін, бизнес өкілдерімен кездескенде де сөз болды. Құзыретті органдар белсенді түрде күш салуы керек. Қайтарылған қаражатты еліміз үшін маңызды жобаларға бағыттауымыз керек.
Дей тұрғанмен, тағы да ескертемін, асыра сілтеуге болмайды. Құқық қорғау органдары тарапынан заңсыздыққа жол берілмейді. Әрбір осындай сигналға өз тарапымнан қатаң шара қолданамын, – деді Қ.Тоқаев.
Мемлекет басшысы мұндай саясаттың негізгі мақсаты елде жайлы инвестициялық климат қалыптастыру екенін айтты.