Президент әуежайда қылмыскерді ұстауға көмектескен азаматты мемлекеттік наградаға ұсынуды тапсырды
Бұл туралы Президенттің баспасөз хатшысы Руслан Желдібай хабарлады.
Алматы, NEGE. «Мемлекет басшысы Қасым-Жомарт Тоқаев Алматы әуежайында адамды кепілге алу жағдайы жөнінде хабардар. Президент қылмыскердің суық қаруын тартып алып, ұстауға көмектескен ер адамның батылдығын ерекше атап өтіп, аталған азаматты мемлекеттік наградаға ұсынуды тапсырды», – деп жазды президенттің баспасөз хатшысы.
Естеріңізге сала кетейік, Алматыда пышақ ұстаған ер адам әуежай қызметкерін кепілге алған.
Ер адам өзін жолаушы ретінде көрсетіп, рейс алдындағы тексеру аймағына кірген.
Авиациялық қауіпсіздік қызметкерлері ер адамнан құжаттарды көрсетуді сұраған, ал ол әуежай қызметкерін шашынан ұстап, пышақпен қорқытқан.
Ер адамды әуежай аумағындағы полицияның желілік бөлімінің қызметкерлері ұстады, деген ресми ақпарат тараған болатын. Кейін пышақ ұстап, әуежай қызметкерін кепілге алған адамды әуежайға танысын шығарып салуға келген ер адам қарусыздандырғаны белгілі болды.
