Президент: Абай ел мүддесі үшін қалтқысыз қызмет етудің үлгісін көрсетті
Алматы, NEGE. Мемлекет басшысы ұлы ақынның рухани мұрасы қазақ халқы үшін ғана емес, бүкіл адамзат үшін құнды екенін атап өтті.
Ақорданың хабарлауынша, президент Тоқаев Абай Құнанбайұлының 180 жылдығына арналған салтанатты іс-шарада қатысушыларға арнайы құттықтау жолдады.
Мемлекет басшысы Абайдың төл мәдениетті дамытудағы рөлін, ұлттың сана-сезімін жаңғыртуға қосқан өлшеусіз үлесін және жаңа әдебиетіміздің негізін қалаған кемеңгерлігін ерекше атап өтті.
– Ол өскелең ұрпақты білімпаз, еңбекқор, адал болуға үндеді. Отанға деген сүйіспеншіліктің және ел мүддесі үшін қалтқысыз қызмет етудің үлгісін көрсетті, – деді президент.
Тоқаев хәкім Абайдың ой-толғамдары мен өсиеттері ешқашан өзектілігін жоғалтпайтынын, оны тану және таныту ісі аса маңызды екенін айтты. Сондай-ақ ол Семей өңірін ұлттық құндылықтар мекені ретінде өркендетуге мемлекет тарапынан ерекше көңіл бөлінетінін жеткізді.
– Ұлы ойшылдың өміршең өлеңдері мен қастерлі қара сөздері әлі талай ұрпаққа рухани азық болары анық. Ұлы Абайдың аманатына адал болайық!, – деді Тоқаев.
