Премьер мақтаған вице-министрдің қызметі өсті
Үкімет қаулысымен Ростислав Коняшкин Қазақстан Республикасының Жасанды интеллект және цифрлық даму бірінші вице-министрі болып тағайындалды. Бұл туралы үкіметтің баспасөз қызметі хабарлады.
Астана, NEGE. Ол бұған дейін жасанды интеллект және цифрлық даму вице-министрі болып қызмет атқарған.
Екі апта бұрын үкімет отырысында қазақша баяндама жасаған Коняшкин премьер-министр Олжас Бектеновтен мақтау сөз естіген еді.
«Қазақша жақсы баяндадыңыз. Дұрыс», – деген премьер.
Ростислав Коняшкин 1989 жылы Жамбыл облысында туған.
М.В. Ломоносов атындағы Мәскеу мемлекеттік университеті мен Л.Н. Гумилев атындағы Еуразия ұлттық университетін тәмамдаған.
Әр жылдары ЦДИАӨМ Мемлекеттік көрсетілетін қызметтер комитеті төрағасының орынбасары, «Ұлттық aқпараттық технологиялар» АҚ басқарма төрағасы, Цифрлық даму, инновациялар және аэроғарыш өнеркәсібінің вице-министрі, жасанды интеллект және цифрлық даму вице-министрі қызметтерін атқарған.