Полиция Таразда соққыға жығылған депутаттың ісіне қатысты пікір білдірді
13 мамыр күні кешке Тараз қаласында Алматы облысы Іле ауданының мәслихат депутаты, заңгер Нұрлан Байғазиевті белгісіз адам соққыға жыққан.
Алматы, NEGE. Оқиға сағат 18:00 шамасында Жамбыл облыстық полиция департаментінің жанындағы «Ғибрат» кафесінің маңында болған. Алдын ала мәлімет бойынша, депутат қызметтік іссапармен келген, клиенттерімен заңгер ретінде кездесіп жатқан. Шабуылдаушы кастет қолданған деген болжам бар.
Жамбыл облысы полиция департаменті баспасөз қызметінің мәліметінше, аталған оқиға бойынша іс қозғалды.
«Оқиғаға қатысы бар адам анықталып, полицияға жеткізілді. Жәбірленушіге медициналық көмек көрсетілді, бірақ ол ауруханаға жатудан бас тартты», – делінген хабарламада.
Сотқа дейінгі тергеу Қылмыстық кодекстің 293-бабы 1-бөлігі (Бұзақылық) бойынша жүргізілуде.
