Петропавлда қоғамдық тәртіпті қадағалау үшін дрондар пайдаланылуда
Петропавл қаласында қоғамдық орындардағы тәртіпті бақылау үшін жасанды интеллектпен жабдықталған дрондар іске қосылады.
Алматы, NEGE. Бұл жоба Солтүстік Қазақстан облыстық прокуратурасының "Заң мен тәртіп" бастамасы аясында жүзеге асырылуда.
Облыстық прокуратура өкілдерінің мәліметінше, жаңа жүйе қоғамдық қауіпсіздікті нақты уақыт режимінде тиімді бақылауға мүмкіндік береді. Қалалық прокуратураның прокуроры Кенесары Мұхамеджановтың айтуынша, дрондар жол қозғалысы ережелерінің бұзылуы, бұзақылық әрекеттер, қоғамдық орындарды ластау, алкоголь өнімдерін ішу секілді құқық бұзушылықтарды аз уақыт ішінде анықтай алады.
Бұндай технологияны қолдану құқық бұзушылықтардың алдын алуға, қоғамдық тәртіпті нығайтуға және құқық қорғау органдарының жұмысын жеңілдетуге бағытталған. Жаңа жоба Петропавл тұрғындарының қауіпсіздігін арттыруға және қаладағы тәртіпті күшейтуге септігін тигізеді деп күтілуде.
