Перизат Қайратпен бірге оқыдым деген қыз ол туралы тағы бір дерек айтты
Желіде су тасқынынан зардап шеккендерге жиналған 1,5 миллиард теңгені жымқырды деген күдікке ілінген ерікті Перизат Қайратпен бірге бұрын бір колледжде оқыған қыздың видеосы тарады. Оның айтуынша, бұған дейін Перизат жатақханада телефон ұрлап, оқудан шыққан.
Алматы, NEGE. Бейтаныс бойжетеннің видеосы Instagram желісіндегі abdulla_kz парақшасында жарияланды. Ол өзінің эстрада-цирк колледжінде Перизат Қайратпен бірге оқығанын алға тартты.
“Сол кезде Ақтаудың колледжінен 2-курсқа Қасенғалиева Перизат деген қыз ауысып келді. Бір жарты жылға жетпейтін аз уақыт ішінде оның артынан жатақханада телефон, камераларды ұрлап, соның ақшасымен күн көретіні туралы әңгіме тарайды. Ол қызды кейін тіпті оқудан шығарып жіберді. Кейде сол қыз қайда кетті екен деп ойлайтын едім”, – деді ол.
Ару бұған дейін желіде тараған ақпаратқа тіптен мән бермегенін алға тартты.
“Кейін ТикТоктан бір қайырымдылық қордың басшысы ұсталып жатыр екен деген ақпаратты көрдім. Бірақ мән беріп қараған жоқпын. Өткізіп жібердім. Кейін қараймын деп жүріп, ұмытып кетіппін. Бүгін менің мұғалімімнен хабарлама келді. “Мынау бізде оқыған Қасенғалиева Перизат пе?” деп сұрапты. Ашып қарасам дәл өзі екен. “Ауру қалса да, әдет қалмайды” деп халық бекер айтпайды екен ғой. Студент кезінде сол ұрлығы үшін оқудан шығарып жіберіп еді, енді қазір бүкіл Қазақстан білетіндей ұсталып жатыр”, – деп қорытты ол.
