Павлодарда ұлы ақынға ескерткіш орнатылады
Абай Құнанбаевтың 175 жылдығына орай Павлодар қаласында ақынның мүсіні М.Катаев атындағы оқушылар сарайының жанынан ашылады. Бұл туралы өңірлік коммуникациялар қызметінде өткен баспасөз мәслихатында облыстық мәдениет, тілдерді дамыту және архив істері басқармасының басшысы Ернұр Дәуенов мәлімдеді.
Абайдың ескерткіші орнатылатын жер облыстағы ардагерлер мен суретшілердің қатысуымен таңдалған. Мұндағы негізгі мақсат - оқушылардың санасына ақынның мұрасын сіңіру. Суретші соңғы эскиздерін бір айдың көлемінде ұсынады. Басқарма басшысының айтуынша, қалалық әкімдіктің шешімімен 2020 жылдың бюджетіне Абай көшесін абаттандыру жұмыстары енгізілген.
«Қазақстан Республикасында орнатылатын ескерткіштер мен монументтер бойынша Мемлекеттік комиссия Абай Құнанбаевтың ескерткішінің эскизін бекітті», - деді Ернұр Дәуенов.
Ескерткіш авторы Асқар Нартов орындаған Абайдың екінші мүсіні болмақ. Алғашқысы Қарағанды қаласына орнатылған.
