Павлодарда өрт сөндіру көлігі мектеп автобусымен соқтығысты
Павлодарда өрт сөндіру көлігі мектеп автобусымен соқтығысты, деп хабарлайды Pavlodarnews.kz сайты.
Алматы, NEGE. Облыстық Полиция департаменті баспасөз қызметінің ақпаратына сай, бүгін сағат 14:15-те Елгин мен Щедрин көшелерінің қиылысында «КамАЗ» маркалы өрт сөндіру көлігі «ПАЗ-32053-70» мектеп автобусымен соқтығысқан. Автобус инерциямен тұрақта тұрған «Volkswagen « жеңіл автокөлігіне соғылған.
Жол-көлік оқиғасы салдарынан кәмелеттік жасқа толмаған 6 бала медициналық көмекке жүгінді.
«Тексеріс жүріп жатыр. Сараптамалар тағайындалды», - делінген полиция хабарламасында.
Облыстық жедел жәрдем станциясының баспасөз қызметінен мәлім еткендей, шақырту туралы хабар сағат 14:19-да түсті. Екі жедел жәрдем бригадасы оқиға орнына 7 минутта жеткен.
Зардап шеккен барлық бала облыстық балалар ауруханасына жеткізілді.