Павлодарда оқ жарақатын алған әскери қызметшінің қазіргі жағдайы мәлім болды
Павлодардағы ІІМ Ұлттық ұланының әскери бөлімдерінің бірінде әріптесінің оғынан жараланған келісімшарт бойынша әскери қызметші жансақтау бөлімінде жатыр.
Астана, NEGE. Бұл жөнінде Павлодар облысының денсаулық сақтау басқармасы хабарлады.
«2001 жылы туған науқас Павлодар қалалық №1 ауруханасының жансақтау бөлімінде жатыр. Жағдайы – тұрақты ауыр. Барлық қажетті емдеу шаралары жүргізілуде», – деп хабарлады басқарманың баспасөз қызметі.
Еске салсақ, Павлодардағы әскери бөлімдердің бірінде келісімшарт бойынша әскери қызметші абайсызда автоматпен әріптесін тізе тұсынан жарақаттап, кейін өзіне қол жұмсаған. Алдын ала мәліметтерге сәйкес, әскери қызметші өзіне бекітілген қарумен атқан.
