Павлодарда қатты желден ағаш құлап, 67 жастағы әйел мерт болды
Павлодардағы аулалардың бірінде қатты желден ағаш құлап, 1957 жылғы әйелді басып қалды.
Алматы, NEGE. Әйел адам ауыр жарақатынан сол жерде мерт болды.
Қайғылы оқиға бүгін таңертең Павлодар қаласы Естай көшесі 89/1 мекенжайында орналасқан көпқабатты үйдің ауласында болған.
«Бүгін сағат 09.37-де Павлодар қаласы Естай көшесіндегі тұрғын үйлер ауласының бірінде әйел адамды құлаған ағаштың басып қалғаны туралы хабар түсті. Жедел жәрдем бригадасы оқиға орнына 6 минутта жетті. 1957 жылғы әйел адам зардап шеккен. Зардап шегушінің екі аяғы, көкірек тұсы, жамбас сүйектері, омыртқасы сынған, ішкі ағзалары жарақаттанған, 3-4-дәрежедегі жарақат шогын алған. Өкінішке қарай, ол алған жарақаты салдарынан көз жұмды» - деп хабарлады жедел жәрдем стансасынан.
Павлодар облысы аумағында желдің екпіні 30 метрге дейін жеткен.
