Павлодарда анасы терезеден лақтырып жіберген екі баланың бірі көз жұмды
Бұл туралы облыстың бала құқықтары жөніндегі уәкілі Сәуле Шәкенова мәлімдеді.
Алматы, NEGE. Павлодарда анасы бесінші қабаттан лақтырып жіберген екі баланың бірі қайтыс болды.
«Өкінішке қарай, дәрігерлердің барлық күш-жігеріне қарамастан, кіші ұл баланың жүрегі тоқтап қалды», – деді ол.
Ақпаратты баланың өмірі үшін екі күн бойы күрескен Павлодар облыстық балалар ауруханасы да растады.
«Сағат 20:10–да баланың жүрегі тоқтады. 20:40–та бала өлімі тіркелді. Дәрігерлер екі тәулік бойы баланың өмірі үшін күресті, бірақ өкінішке қарай, оны аман алып қалу мүмкін болмады», – делінген хабарламада.
Еске сала кетсек, 30 шілдеде әйел адам екі баласын терезеден лақтырып, содан кейін өзі 5-қабаттан секіріп кеткені хабарланған болатын.