Павлодарда тәрбиеші 16 баланы ұрып-соққаны үшін 4,5 жылға сотталды
Павлодарда 2–2,5 жастағы 16 баланы ұрып-соқты деп айыпталған балабақша тәрбиешісіне қатысты үкім шықты.
Астана, NEGE. Бас прокуратураның мәліметінше, сотталушының балаларға жүйелі түрде зорлық-зомбылық көрсетіп келгені анықталған. Тәрбиеші оларды ұрып-соғып, шаштарынан тартып, лақтырып, дене жарақатын салып, психикалық зардап келтірген.
«Тәрбиешінің кінәсі мемлекеттік айыптауды қолдаған прокурордың белсенді ұстанымының арқасында дәлелденді, ол бұлтартпас дәлелдер ұсынып, ауырлататын мән-жайларды ескере отырып, неғұрлым ауыр айып тақты», – делінген хабарламада.
17 сәуірде сот оған 4 жыл 6 ай мерзімге бас бостандығынан айыру жазасын тағайындады. Алайда жазаны өтеу мерзімі кейінге қалдырылды. Сондай-ақ оған 3 жылға педагогикалық қызметпен айналысуға тыйым салынды.
Үкім заңды күшіне енген жоқ.