Павлодар облысының шенеуніктері жұмыс уақытында шекара асып кеткен
Ертіс-Баян өңірінде бірқатар мемлекеттік қызметші жұмыс уақытында шекара асып, Ресейге шығып кеткені белгілі болды, деп хабарлайды Kazinform.
Алматы, NEGE. Алайда шенеуніктердің еңбек табелінде жұмыста болған деп көрсетіліп, жалақы алған.
Еңбек табелін жалған ақпаратпен толтырған мемлекеттік қызметшілердің мәселесі әдеп кеңесінің кезекті отырысында қаралды.
Жұмыс уақытында ел ішінде болмаған шенеуніктердің бірі - Екібастұз қалалық тұрғын үй инспекциясы басшысының орынбасары. Ол 2024 жылдың қараша айында Ресей Федерациясы бағытында шекараны кесіп өткен. Жұмыстан отбасы жағдайыма байланысты деп сұранған. Бірақ еңбек табелі басқаша толтырылып, ел ішінде болмаған күндері үшін де еңбекақы жазылған.
Ал өткен жылдың желтоқсан айында Железин ауданы Ақтау ауылдық округі аппаратының бас маманы да жұмыс уақытында мемлекеттік шекарадан шыққан. Ол басшысынан денсаулығына байланысты аудан орталығына барамын деп сұранған екен. Бұл жағдайда да қызметкердің жұмыста болғандығы көрсетілген.
Әдеп жөніндегі кеңес барысында мекеме басшылары қоластындағы қызметкерлердің жөнсіз қылығы үшін кешірім сұрап, бақылау кезінде жіберген кемшіліктерін мойындады. Кеңес мүшелері Екібастұз қаласының әкіміне және Железин ауданының әкіміне шенеуніктерге қызметке толық сәйкес еместігі туралы ескерту беру керектігін ұсынды.
